Bygdarráðið hevur gjørt av, at hava almennan ruddingardag leygardagin 12. mai 2012.

Ruddingardagurin byrjar við morgunmati í dansistovuni kl. 9.30, har ið øll tey uppmøttu verða býtt upp í bólkar.

Farið verður runt bygdina, har tikið verður upp leyst pappír, plastikkposar og órudd,v.m.

Umleið Kl. 13.00 – 14.00, savnast vit aftur í dansistovuni har boðið verður til heitan súpan.

Kommunan letur ein plantupakka til hvørt húskið, sum luttaka á ruddingardegnum.

Um bygdin skal verða innbjóðandi nú summari nærkast, er neyðugt at hvør einstakur okkara ger sítt til at prýða um bygdina.

Vit gleða okkum, at síggja tykkum, og at vit í felag kunnu vera saman um eitt tiltak ið gagnar okkum øllum.

Vinarlig heilsan

Sumbiar kommuna

Eitt greitt NEI í Sumbiar kommunu til kommunusamanlegging, har heilu 86,6 % søgdu nei, bert 13,4 % søgdu ja.

Í døgunum 17. – 20. mai verður skipað fyri mentanardøgum í Sunnba undir heitinum "Sunnast í Føroyum".

Sambært kunngerð nr. 26 frá 23. mars 2012 um vegleiðandi fólkaatkvøðu um kommunusamanlegging verður fólkaatkvøða hildin í øllum kommunum um kommunusamanlegging hósdagin 3. mai 2012.

Tað verður hervið gjørt kunnugt, at vallistar fyri SUMBA, LOPRA og AKRAR til vegleiðandi fólkaatkvøðuna um kommunu-samanlegging 03. mai 2012 liggja frammi til alment eftirlit á kommunuskrivstovuni frá 11. apríl til 24. apríl 2012 í vanligari avgreiðslutíð mánadag til fríggjadag.

Kæra um at onkur ikki er komin á listan, ella onkur av órøttum er tikin við, skal skrivliga verða bygdaráðnum í hendi í seinasta lagi 26. apríl 2012.

Til fólkaatkvøðuna verða valkort nýtt, og verða tey send veljarum í kommununi í seinasta lagi 2 vikur undan valinum, og skal veljarin hava valkortið við, tá valt verður.

Sumba, tann 11.apríl 2012

Sumbiar  kommuna